terça-feira, 24 de abril de 2007

Komunikadu Imprensa -Lu Olo hatete ba Ramos Horta: Tenke Respeita Independénsia Judisiária

Francisco Guterres Lu Olo ba Prezidente
“Hau se sai Prezidenti Hosi Povu ba Povu Tomak”

Komunikadu ba Imprensa
Tersa 24 Abril 2007

Lu Olo hatete ba Ramos Horta: Tenke Respeita Independénsia Judisiária


Kandidatu Prezidensial Francisco Guterres “Lu Olo” ohin husu Sr. Ramos Horta, atu respeita Konstituisaun no para halo interferénsia iha sistema judisiáriu.

Lu Olo hatete katak, sé nia eleitu duni ba Prezidente RDTL, nia sei haka’as a’an kedas hmutuk ho governu, parlamentu no parseirus desenvolvimentu atu hadia Ministeriu Pibliku, no reforsa sira nia independensia.

Ida ne’e mak rekomendasaun bot liu hosi relatóriu ne’ebé Komisaun Espesial Independente Nasoens Unidas nian ne’ebé halo inkéritu kona ba krize Timor-Leste nian, iha Outubru tinan kotuk.

Horseik ( dia 24 de Abril), Sr. Horta hatete katak sé nia manán eleisaun, nia sei fó orden bá Prokurador Jeral atu loke fila fali investigasaun kona ba kazus ne’ebé mosu iha Maiu-Junho tinan kotuk.

Lu Olo hatete: “Ne’e inkonstitusional. La tuir Konstituisaun sé Prezidente RDTL mak deside kona ba servisu ne’ebé Gabinete Prokurador Jeral tenke halao ka lae. Ita nia Konstitutisaun hatete momós kona ba pontu nee, ne’e duni, ema ne’ebé koalia hasoru pontu ne’e, la iha responsabilidade. Ita nia lideres hotu-hotu tenke iha responsabilidade atu esklarese lolós ba ita nia Povu oinsa ita nia sistema justisa funsiona iha demokrasia laran, ne’ebé sei núrak iha Timor-Leste.

Lu Olo husu ema atu hanoin fila fali relatóriu ne’ebé Komisaun Inkéritu Independente Internasional Nasoens Unidas nian (KII), ne’ebé fo sai ba públiku iha tinan kotuk.

“Relatóriu nee dehan katak tenke fó atensaun ba sistema judisiáriu tamba ema hanoin katak Gabinete Prokurador Jeral Repúblika nian iha interferénsia hosi Prezidenti Repúblika. “

“Ita hakarak Prezidente Repúblika ne’ebé deside sesé maka tenke ba Tribunal no sesé maka tenke simu kastigu hanesan iha tempu Suharto nian?” Lu Olo husu.
Internasional barak, inkluindu KII, ne’ebé halao investigasaun independente kona ba krize hahú iha Maiu 2006, tatoli katak “sistema justisa fraku” moos kontribui ba hamosu krize ida ne’ebé halo Povu Timor-Leste terus barak.

Ba ida ne’e, Lu Olo dehan: “Ita tenke reforsa ita nia instituisaun judisiária ne’ebé oras ne’e fraku iha ita nia demokrasia ne’ebé sei núrak. Hau defende bebeik katak ita nia lideres sira tenke respeita ita nia Konstituisaun no instituisoens demokrátikas. Nia dehan ita tenke fo fokus makas liu ba independénsia ba sistema judisiáriu no instituisoens xaves iha Timor-Leste. Sr. Horta koalia sala bei’beik bainhira nia halao dadauk ninia knaar hanesan Primeiru Ministru, e agora, nia hatudu katak nia sei halakon independensia judisiária, sé nia eleitu ba , Prezidente Repúblika.

Lu Olo hatete : “Hau komprometi a’an ba ida nee” - “Nudar Prezidente, hau sei hakás a’an kedas hamutuk ho orgaun soberania sira seluk atu assegura katak sistema judisiariu, inkluindu Ministeriu Publiku, hetan rekursus tomak neebe sira persiza atu bele halau sira nia knaar ho independensia no transparensia.”



Hakarak hatene ta’an informasaun, bele dere arame bá:

Harold Moucho (LuOlo nia assessor polítiku) (+670) 723 0048
José Manuel Fernandes (reprezentante Lu Olo nian ba eleisoens) (+670) 734 2174 (Dili)

http://luolobapresidente.blogspot.com, HYPERLINK "http://luolo.blogspot.com" http://luolo.blogspot.com, http://www. timortruth.com

0 comments: