domingo, 1 de abril de 2007

Komunikadu Imprensa - Organizadór kampaña Ramos–Horta nian la tuir kódigu eleisaun

FRENTE REVOLUCIONÁRIA DO TIMOR-LESTE INDEPENDENTE
FRETILIN


Komunikadu ba imprensa
Loron 31, Fulan Marsu, Tinan 2007

Organizadór kampaña Ramos–Horta nian la tuir kódigu eleisaun

Organizadór boot ba kampaña eleisaun prezidensiál Ramos-Horta nian la tuir kódigu eleisaun bainhira nia fó-sai deklarasaun ne'ebé defende asaun asaltu kontra sidadaun Timor-Leste nian husi tropa Australiana.

Dionísio Babo Soares maka asina deklarasaun nee iha sesta-feira loron 30 fulan Marsu iha Antara news, husi Indonézia, ho títulu “Reprezentante Partidu Fretilin la fó dalan ba tropa Austrália” (http://www.antara.co.id/en/arc/2007/3/30/fretilin-party-representatives-hinder-australian-troops/)

Soares-nia statement ne'e la fó-sai katak nia maka reprezentante ofisiál husi Komisaun Nasionál Eleitorál (CNE) ba kandidatu prezidensiál Ramos-Horta nian no mós sekretáriu-jerál interinu ba partidu “Konsellu Nasionál ba Rekonstrusaun Timor-Leste” (CNRT), partidu foun ne'ebé Prezidente Xanana Gusmão foin harii.

Soares falla tuir kódigu eleitorál tanba nia la identifika ninia pozisaun iha kampaña no partidu ne’e. Kandidatu hotu-hotu no sira nia reprezentante ofisiál konkorda tiha ona katak sira tenke hatudu hahalok ne'ebé transparente, dehan Filomeno Aleixo, membru Komisaun Polítika Nasionál Fretilin nian.

“Reprezentante ofisiál ne'e hatudu hahalok hanesan bobar no lohi tanba nia la fó-sai ninia pozisaun polítika no finje katak nia hanesan fó relatóriu neturál,” katak Aleixo.

Aleixo haktuir katak Soares nia deklarasaun la fó-sai faktu kona ba eventu ida ne'ebé akontese iha loron 26 fulan Marsu no Soares mós interpreta sala Fretilin-nia pozisaun kona ba tropa Australian iha Timor-Leste laran.

“Ekipa Ramos-Horta nian tuir loloos buka estabelese faktus uluk lai kona-ba insidente ne'e no defende direitus-umanus sidadaun Timor-Leste nian molok defende tropa Australiana,” Aleixo hatete.

Fretilin protesta tiha ona ba Brigadeiru Mal Rerden, komandante forsa Australiana nian, kona-ba asaltu ne'ebé akontese bainhira komitiva Fretilin nian sai husi Gleno hafoin komísiu ba kandidatu prezidensiál Francisco “Lu’Olo” Guterres, nebe hala'o hotu ho dame.

Karreta tropa Australiana nian hakarak halai liu komitiva Fretilin nian maibé sira la konsege liu. Depois soldadu Australianu ida sé kilat ba kondutór-nia ulun no soldadu seluk dada joven ida, naran Ramos, sai husi karreta kotuk, sama nia ba rai no tau kilat ba nia ulun.


Kontaktu:
Filomeno Aleixo (+670) 724 3460 (Dili)
José Manuel Fernandes (Reprezentante ofisiál ba Francisco Guterres Lu Olo) : (+670) 734 2174 (Dili)
Arsénio Bano (+670) 723 0023 (Dili)

0 comments: