MENSAJEN LU OLO NIAN BA ENSERAMENTU KAMPANHA

Francisco Guterres “Lu Olo” ba Prezidente “Prezidente husi povu ba povu tomak” Domingo 6 Maio 2007

MENSAJEN

Ohin, loron ikus ba halao kampaña prezidensial, hau hakarak hato‘o hau nia agradesimentu bo‘ot ba órgauns informasaum hotu hotu, nasional no internasional, nebe tuir hau nia kampaña no hato‘o ba povu Timor-Leste tomak saida mak hau hanoin no hakarak iha tinan lima nia laran ba oin, nudar prezidente Repúblika Demokrátika Timor-Leste. Ne’e onra boot ida ba hau no hau promete ohin ba maluk sira hotu ke hau sei hakruk ba Konstituisaun RDTL, lei inan Timor-Leste nia, nebe hau rasik fo kontribuisaun ba halo núdar Prezidente Asembleia Konstituinte nian. Tuir Konstituisaun, órgauns soberania sira iha konpeténsia ida idak ninian, maibé, servisu hamutuk ba objetivus hanesan: hametin estadu direitu demokrátiku, hametin ita nia soberania nasional, haburas ita nia rai Timor-Leste, no hadia povu maubere nia moris.. Hau kandidata ba segunda volta eleisaun prezidensial nian ho fiar tomak katak hau mak kandidatu diak liu ba sai Prezidente Repúblika tamba:hau iha experiensia. Núdar Prezidente Parlamentu, hau hatene oin sa maka halau diálogu ho maluk sira hotu, órgauns de soberania, partidus politikus no grupus sosiedade sivil nian ka sidadaun ida idak Timor-Leste nian. Hau hadomi povu Timor-Leste no prontu ba halu sakrifisiu hodi hamutuk ho órgauns soberania hotu hotu no sosiedade sivil atu hasai povo ida ne‘e husi kiak, no nakukun laran.

Hau bolu konferénsia de imprensa ohin, loron ikus kampaña nian, atu koalia kona ba sé maka povu sei hili ba Prezidente da Repúblika, kuarta-feira, 9 de Maio 2007.

Hau nia adversáriu aprezenta a‘an hanesan defensór ema kiak nian no ataka FRETILIN, dehan katak la tau matan ba ema kiak no ema ne’ebé presisa tebe tebes ajuda husi Estado.

Hau nia resposta simples. Hau húsu votantes sira ba haré saída maka halo semana uluk no semana oin mai ne’e. Ministru da Agrikultura, Florestas noPeskas nian, Estanislau da Silva, nebé lider FRETILIN nian, autoriza ona ninia Ministériu ba ható Fundu Komunitáriu ba sukus hotu hotu. Suku ida idak, iha Timor-Leste, sei simu dólar amerikanu rihun sanulu. Programa ne hahú iha doutor Mari Alktiri nia tempu hodi implementa politika FRETILIN nian. Programa ne liu husi Parlamentu Nasional, órgaun estadu nebé hau kaer núdar Prezidente, no partido hotu hotu aprova ba halao. Osan ne sei ba to baze hodi haburas projetu agrikultura nian ba tempu naruk.Osan ne‘e foin maka iha tinan ida ne‘e, liu husi Orsamentu Jeral do Estado, nebé hasai husi Fundo Mina Rai. Osan mira rai nian, fahe tuir kanal estadu nian, la‘os fahe arbiru deit, hanesan esmola ne’eb’e ema riku fó ba ema kiak. Osan Mina Rai nian pertense ba povu.. Povu iha direito ba hetan benefísius dezenvolvimentu nian. Timor-Leste nia. ósan, fo tuir Fundu Komunitáriu nian, la‘os halo karidade. La halo hanesan, foin dadaun ema balu fahe mantas nebé mai husi rai seluk. Fundu Komunitáriu simu osan nebé transfere tuir leis, tuir direitos povu nian, hahú kedas hó Asembleia Konstituinte. Ne‘e osan povo nian ba ajuda povu. Ne maka independénsia. Hamrik no tani nafatin prinsipius nebé hamanas ita nia laran no halu ita luta ho brani iha Frente Armada, iha Frente Klandestina nor Frente Diplomatika Ne‘‘e maka nasionalismu lolós, ne maka independensia lolós.

Saida tan maka hau hakarak votantes sira hanoin molok sira hili prezidente RDTL nian iha quarta-feira ohin mai ne‘e?

Hau foin koalia kona ba Fundu Minarai. Karik FRETILIN la iha, Timor-Leste la iha mos Fundu Mina Rai. Hau husu votantes sira labele soe serbisu nebé halo iha tinan liman nia laran, hodi fo garantia soberania ba povu maubere , hodi fiar fali ema nebe promete, mai be, sei dauk prova sira nia hahalok.

Agora ita moris iha krise nia laran, ne‘e duni la moris ho laran hakmatek. Hau husu ba votantes sira ba konfia hau tamba hau sei halao servisu hanesan hau promete; imi hotu koñese hau nia hahalok husi tinan 1975.

Hau hakarak votantes sira hanoin kona ba maluk sira nebe presisa liuliu estadu nia tulun no sira ninia direitus. . Se maka prezidente diak liu ba tau matan ba veteranus sira, maluk feto sira nor ita nia juventude.

FRETILIN prova ona nia hahalok diak. Ami aprova leis no halao programas ba hato’o tulun ba grupu sira né. Maibé, hau sei husu ba halao ta’an ideias foun.

Horseik, iha Parque Borja da Costa, hau halo promesa ida, hau hatete katak, núdar Presidente, hau sei hakás a‘an ba servisu ho povu iha baze, hó ema nebé lakon sira nia familia, faluk sira nor órfauns sira, nebe lakon sira ninia lain ka feen, aman ka inan, durante ita nia luta ba independénsia. Hau koalia kona ba povu iha baze, nebé seidauk hetan rekoñesimentu to‘o ohin loron.

Ami aprova ona leis ba apoia veteranus FALINTIL nian, no Frente Klandestina, maibé, ita la bele haluha faluk no oan kiak sira nebé seidauk hetan ajuda.

Hau sei hakás a‘an ba hadia mekanimus ba ajuda ema sira ne‘e.

Gabinete feto sira nian no juventude nian, nebé hau promte atu hari, sei halao servisu ida ne‘e.

Hau promete ba imi, katak hau sei sai prezidente ida nebé sei simu imi ba koalia. Hau promete atu hetan bebeik membrus komunidade nian. Hau sei sé tilun ba imi nia ideas no nesessiddes. Hau sei visita imi bei‘beik hodi haré, sé Plano Nasional Desenconviemnto no Orsamentu Estadu nian lao tuir dalan lós.Hau sei sai imi nia defensór iha órgauns de sobrania hanesan Parlamento nor Conselho de Ministros.

Hau sei sai Prezidente husi povu ba povo tomak.

Hau hein katak eleisaun segunda volta sei halao ho democrasia , seguransa, no dame.

Viva Timor-Leste.

Hakarak hatene ta’an informasaun, bele dere arame ba:

Harold Moucho (Lu Olo nia asesor polítiku) (+670) 723 0048 (Dili)
Jose Manuel Fernandes (Lu Olo nia reprezentante ba eleisaun prezidensial) (+670) 734 2174 (Dili)
http://www.luolobapresidente.blogspot.com, http://luolo.blogspot.com, http://www.timortruth.com